رجيم البيض

كثر الحديث عن رجيم البيض وكيف انطبق رجيم البيض وشنو النتائج
خل نتحدث عن هذا الرجيم عن سلبياته وايجابياته
طبعا هذا النوع من الرجيم هو لكسر ثبات الوزن وثبات الوزن بالكيتو دايت لازم نعرف الثبات الحقيقي من الثبات الوهمي نقطه مهمه لازم نعرفهه
ثانيا هذا النظام الغرض منه معالجة قضيه معينه وليس نظام نمطي نستمر عليه اطول فتره معينه
ثالثا الكل يعرف القيمه الغذائيه للبيض وفوائد البيض الي لاتعد ولاتحصى وهو غني بالبروتين الجيد والدهون الصحيه (كلسترول اوميگا 3 اوميكا 6) و فيتامين AوDوB12 وكالسيوم وحديد ومغنسيوم وبوتاسيوم وسلينيوم وفسفور وكبريت طبعا وبنسب متفاوته يعني البيض عباره عن مجمع للفيتامينات والمعادن يعني ماريد اطول بفوائد البيض لان لو تبحثون اكثر راح انتم تتاكدون من الفوائد الكبيره
طيب خل نرجع لرجيم البيض هو صحي او غير صحي طبعا صحي بشروط
الشرط الاول لازم مانستمر عليه اطول فتره يعني لازم خمسة ايام الى سبعه
قدر الإمكان لازم البيض يكون اورگنك عضوي طبعا ماريد ادخل بهذا الموضوع لان راح يفتح موضوع مفصل وقد يتهمنا البعض بان جاي نعقد الامر ولكن للامانه العلميه لازم تتوضح بان اكو فرق جدا كبير بين البيض العضوي والبيض العادي الي اغلب الاسواق هي مليئه بهذا البيض الي يعتمد على دجاج الاقفاص المحبوسه او الي يكون غذائهه العلف ثابت بشكل يومي عباره عن بروتين وهرمون لغرض منه تسمين الدجاجه وكذلك عظام الحيوانات المطحونه وخلطهه مع الاعلاف عكس دجاج المزارع الي يكون عايش بمساحات اوسع وغذائه من الحشاش والحبوب الطبيعيه ولهذا هاي النقطه مهمه لازم نركز عليهه لو نلاحظ بيض دجاج العرب او البلدي يكون شديد الصفار عكس بيض الاسواق الي يكون صفار فاتح يميل للشفاف وهذه هم ميزه نميز بيهه البيض العضوي عن البيض العادي
كذلك البيض مثل ماذكرت يحتوي على اوميگا ٦ هذا النوع من الدهون كثرته اسبب التهابات عكس الاوميگا ثري وكذلك يحتوي على الكبريت الي كثرته اسبب رائحه غير محببه…
وعليه والخلاصه اذا نريد نستخدم هذا النوع من الرجيم لازم مانستمر عليه فتره طويله لان يتكون من نمط واحد واحنه دائما نوصي التنويع مطلوب زين مو انتم جماعة الكيتو اشو يوميه بيض بيض بيض كاتبين بالجداول اي صح كاتبين يوميه بيض بس جدول متنوع وبيه لحوم وخضروات اني اتكلم على البيض وحده بدون اضافات
طولت اعرف بروحي زين الطريقه المثاليه لتطبيق هذا الرجيم
بالمختصر باليوم لازم من ٦ بيضات الى ٩ بيضات مقسمه على الوجبات طبعا افضل ٩
اكو البعض يضيف دهون للبيض واني رأيي بدون اضافة دهون لان البيض بالاساس غني بالدهون ولكن هي غايتنا كسر ثبات الوزن ولازم نحرق من دهون الجسم بدون اضافة دهون
كذلك انضيف خضروات ورقيه حصرا بكميه معتدله يعني كرفس ريحان جريجير نعناع ورقيه حصرا
شاي قهوه شاي اخضر
قدح محلول كيتوني تعويض الجسم بالاملاح
غير هاي الاشياء ممنوع الاضافه وابوس ايديكم لحد يسئل ممكن نضيف هاي نضيف ذيج
غير الاشياء الي ذكرتهه ممنوع الاضافه هذا هو رجيم البيض واذكر من خمسة ايام الى سبعه وارجع للكيتو بشكل طبيعي
وهسه وضح رجيم البيض فوائده ومضاره وتحياتي الكم

اترك رد

لن يتم نشر عنوان بريدك الإلكتروني.