لماذا توقف الكيتو عندي وثبت وزني؟

لماذا توقف الكيتو عندي وثبت وزني؟

سؤال : ليش الكيتو بطل يشتغل وياي وثبت وزني ؟
الجواب :
راح يكون الجواب على شكل نقاط فخلي بالك يمي وركز وياي من فضلك
١. انت متأكد دتمشي كيتو صحيح لو دتخربط وتزاغل مرات؟ الغش بالكيتو أكيد رح يخرجك عن الكيتو ويمنعك من خسارة الوزن بسرعة.
٢. دتصوم صيام متقطع ؟ الصيام المتقطع يخفض هرمون الأنسولين ويرفع من مستوى الكيتونات بالدم وأفضل أنواع الصيام هو 8/16 يعني 16 ساعة صيام مقابل 8 ساعات أكل ولا تخلي ساعات الأكل ثابتة حتى ما يتعود جسمك عليها.. بمعنى آخر خلي وجباتك متفرقة يوم تفطر بالوحدة الظهر وثاني يوم تفطر الساعة ٥ العصر وثالث يوم الساعة ٢ الظهر وهكذا. هاي الحيلة البسيطة راح تخدع الجسم وتخلي في عملية حرق مستمرة للدهون وما يعرف بأي وقت يجيه الطعام.
٣. عندك مشاكل صحية؟ كأن تكون السكري النوع الثاني أو رفع الغدة الدرقية أو المرارة او إمساك مزمن. هاي المشاكل الصحية تحتاج اهتمام خاص من عندك وتتطلب مزيد جهد.
٤. دتنام ٨ ساعات يومياً؟ شلونك مع الحالة النفسية والقلق والعصبية؟ الكيتو وحرق الدهون يشتغل أثناء النوم وليس أثناء فترة النهار.. والحالة النفسية والقلق المزمن يرفع من هرمون (القلق) الكورتيزول الي بدوره يحفز الأنسولين والانسولين إذا حضر وتواجد بالساحة فراح يتوقف حرق الدهون نقطة رأس سطر ما بيها نقاش وكلام. اعيدها مرة ثانية : الأنسولين إذا حضر وتواجد بالساحة فراح يتوقف حرق الدهون نهائياً.
٥. ديزيد العضل عندك ؟ بعض الناس الي ماشين كيتو ويمارس رياضة أسبوعياً مراح يلاحظ أي تغير بالوزن ويحس وزنه ثابت بينما هو حجم العضل ديزيد وازداد وزن العضلة وكبر.
بعض الناس بالكيتو يكون نزولهم أسرع مع العلم انه همه في عائلة وحدة كأن يكون الزوج والزوجة والأم وابنها وياكلون نفس الأكل ويتبعون نفس الجدول الغذائي لكن الزوج نزل وزنه بسرعة وبقت الزوجة.. أو الأبن نزل وزنه وبقت الأم نفس الوزن أو نزول طفيف. زين همه ينزلون وزن وأنت أو أنتي باقية ما نزل الوزن لذلك الأمر محبط جداً ومحزن.
إذا كانت عندك حالة (مقاومة الأنسولين) المزمنة طول حياتك فأنت راح تواجه صعوبات كبيرة تأخذ منك كثير مجهود ومو سهلة. وهذا يستلزم منك أن ترفع من مستوى جهودك المبذولة حتى تعادل كفة مستوى حجم المشكلة.
وهنا اكو أمور مهمة أريد أتكلم عنها :

  1. الكربوهيدرات (الكارب) : المسموح بالكيتو من الكارب بين 20 إلى 50 غرام فقط باليوم.. باليوم وليس بالوجبة الواحدة!
    الحل هو أن تخفض هاي النسبة إلى 10 غم فقط في اليوم.
  2. الخضراوات : دائماً أوصيكم بالخضراوات بين 7 إلى 10 أكواب باليوم وان ما تحسب الكارب الموجود بالخضراوات من ضمن حصتك اليومية المقررة من الكارب الي هي 20 إلى 50 غم باليوم.
    الخس على سبيل المثال يحتوي 1.5 غم من الكارب ويحتوي ألياف 1 غم فإذا طرحنا نسبة الألياف من الكارب راح يطلع مجموع الكارب الصافي هو 0.5 غم يعني (نصف غرام) وهذا شي قليل جداً.. صحيح؟
    لا مو صحيح لأن إذا استهلكت عشرة أكواب باليوم ضرب نصف غرام راح تطلع النتيجة من الكارب الصافي 5 غرامات.. انت تعتبرها خمس غرامات لا شيء بس هي بالحقيقة مهمة وتأثر عليك. هذا بس الخس
    السبانخ مثلاً يحتوي 1.1 غم كارب والالياف 0.7 غم راح يبقى أربع غرامات صافية لعشرة أكواب باليوم. وهاي بس من السبانخ
    ومرة ثانية انت تعتبرها لا شيء 4 غم كارب بس هي بالحقيقة شيء وتأثر. ونفس الكلام مع المكسرات (19غم كارب صافي) والتوت البري (17 غم كارب صافي). فلازم تعيد النظر بالكارب والكارب المخفي
  3. لا تكثر من المشروبات أثناء فترة الصيام وخصوصاً القهوة والشاي أو تضيف معاها الكريمة أو السكر المحلى لأن كثرة الكافيين تبعدك عن نمط حرق الدهون fat burning mode.
  4. كمية الدهون الي تتناولها : الهدف الأساسي من الكيتو هو أن تجعل جسمك يشتغل على الشحوم المخزونة وليس على الدهون المأكولة. فأنت من راح تاكل دهون، جسمك يحولها إلى كيتونات. بس هاي الكيتونات جايه من وجبات الطعام وليس من شحمك وهنا يجي دور الصيام المتقطع وأهمية وجبتين باليوم مو ثلاث وجبات. مفتاح الدهون بايدك انت تقلل من تحس بالشبع وانت ازيدها من تحس بالجوع. وهكذا
  5. الكحول : بالإضافة إلى كون الكحول مدمر للكبد فهو محلول كيميائي مذيب solvent. لأن الكحول يعرقل عمل الكبد بتحويل الشحوم إلى كيتونات. اني قريت أحد التعليقات الأجنبية لمتابعي الدكتور بيرغ شخص ماشي تمام على الكيتو لكن وزنه توقف ينزل وشفت البرنامج الغذائي مالته مضبوط بس لاحظت انه يشرب كحول لمدة 10 ايام ويترك 5 أيام ما يشرب بيها.. انت تخيل حجم المجهود الي يقوم بي الكبد وخصوصاً هو كان يشرب أكثر من 12 كأس من الكحول يومياً!!! فكر بجسمك شلون يحصل على الكيتونات؟ يحصل عليها من خلال الكبد وإذا انت كنت تدمر الكبد لمدة عشرة أيام متتالية فيستلزم منك شهر أو أكثر من شهر حتى يعالج الكبد نفسه من أضرار الكحول!! فالكحول ليس صديق للكيتو وأنصح كل إنسان كيتو يتناول الكحول أن يبتعد عنه لأن الكحول ليس صديق للصحة ولا للكيتو.

التعليقات مغلقة، ولكن تركبكس وبينغبكس مفتوحة.