ما هي الأشياء الي تطلعني خارج الكيتو؟

سؤال : شنو الأشياء الي تطلعني خارج الكيتو؟
كلنا نعرف انو السكر والكربوهيدرات ممكن يطلعنا خارج الكيتوسس لكن
الجواب بإختصار حتى ما أطيل عليكم لأن الموضوع مفصل هي ثمانية أشياء قد تكون مفاجئة الك :

  1. الحالة النفسية والقلق Stress:
    نعم الحالة النفسية والقلق والمشاكل بالبيت أو العمل أو علاقة عاطفية مسمومة أو خسارة شخص عزيز أو قلق ما قبل عملية جراحية أو ولادة قد تحفز هرمون القلق (الكورتيزول) وهذا الهرمون تأثيره مدمر على مستويات الأنسولين لأن عين الباردة عليهم يشتغلون هذولي الهرمونين (الكورتيزول والانسولين) سويه.. انتو ما ملاحظين مرات اكو ناس من تضوج تأكل؟ هذا هو السبب
  2. المبالغة بالكافايين Excessive caffeine :
    اشرب كوب قهوة الصبح ماكو اي مشكلة.. بس لا تاخذ اليوم كله تشرب قهوة أو شاي. لأن الكافيين الزايد يحفز الادرينالين الي ممكن يحفز الأنسولين. دتلاحظون شلون الهرمونات مرتبطة بعضها مع بعض ومصيبة الوزن الزائد هي مع الأنسولين.. اذا غاب الأنسولين خسرنا وزن.. وإذا حضر الأنسولين ثبت الوزن.
  3. حساء العظام (السووب) bone broth :
    السووب بكميات كبيرة ممكن يخرجنا خارج الكيتو، لكن كمية معتدلة باليوم ما تأثر. اوكي؟ لأن السووب يحتوي بروتين وزيادة البروتين تتحول إلى سكر الدم كلوكوز.. ونفس الكلام ينطبق على علب البروتين whey protein الي ياخذوها لاعبي كمال الأجسام ومطبقين الكيتو.
  4. الصلصات والمقبلات والكاتشاب MSG :
    اكو مادة كيميائية أسمها مونوصوديوم غلوتاميت MSG موجودة في معظم الصلصات ومتبلات السلطات والكاتشاب تعزز الطعم وهاي المادة سهل تتجنبها إذا كنت تتسوق بس صعب جداً إذا كنت رايح أو معزوم بمطعم لأن تسعين بالمية من المقبلات والسلطات الي يخلوها أمامك تحتوي على هاي المادة MSG. شلون تعرفها؟ اي طبق تحسه طعمه حلو اعرف انو هاي المادة موجودة. وخصوصاً بمطاعم الوجبات السريعة 😉
  5. المحليات الصناعية artificial sweeteners :
    السكرين والدكسترين والمالتوكستدرين هي محليات صناعية ترفع الأنسولين وتخرجك خارج الكيتو.
  6. البروتين الزايد excess protein :
    البروتين الزائد ممكن يخرجك خارج الكيتو لأن مثل ما گلنا قبل شويه البروتين الزائد يحوله الأنسولين إلى سكر الدم ويرفع من مستويات الأنسولين ولذلك يوصى بالنظام الكيتوني أن تكون نسبة البروتين بين 85 – 170 غرام (بالوجبة الواحدة) وإذا قللت الوجبات من ٣ إلى ٢ ثم إلى وجبة وحدة باليوم فأنت كل مرة تلغي بيها وجبة لازم تزيد نسبة البروتين.
    معلومة زغيرونه : هل تعلم انك إذا دمجت البروتين مع السكر فإن الأنسولين سيتضاعف أضعاف ما يفرزه مع البروتين لوحده!!
  7. الحلويات الكيتونية keto desserts :
    من ضمن الأشياء المميزة بالكيتو هو احتوائه على أطباق مميزة ولذيذة منها الحلويات الكيتونية (الكيك / البودنج/ كعكة الشوكولاته وغيرها) وعادة ما يتم استعمال سكر الاستيفيا أو الاريثريتول أو المالتيتول وكلها حلويات كيتونية طيبة.. بس احب انوه على شغله مهمة : مو معنى هاي المادة صديقة للكيتو فاحنه ناكل منها بكميات كبيرة.. انتم تدرون شراب السعال cough syrup يحتوي السكر!! الكحول.. البيرة.. العصائر بيها سكر وهاي الأمور قد تكون أنت غير مدرك الها بس هي تحتوي سكر.
  8. الوجبة المفتوحة non-keto meal :
    أكيد الوجبة المفتوحة تخرجك خارج الكيتو بدون نقاش.. واني أبداً ما أشجع اي كيتوني أو كيتونية يأخذ وجبة مفتوحة لأن رح يضيع تعب أسابيع وأشهر. والجسم رح يكون محتار ويدخل في متاهه : الجسم كان متعود على الكارب سنين طويلة بعدين قررت تسوي كيتو بدأ الجسم يتعود على الدهون رجعت أكلت وجبة مفتوحة رجع الجسم على الكارب بعدين تندمت تريد ترجع كيتو وراح يدخل الجسم وياك في متاهه ودوامه فارغة!!!! نصيحة مني إذا بديت أو بديتي كيتو لا تخربطين.. اني مريت في مواقف صعبة ومغريات بس الإرادة كانت موجودة والمعلومة عن مخاطر السكر للجسم كانت ما تفارقني ولذلك نجحت ووصلت لهدفي وسعيد بلي حققته. واني مدين جداً للكيتو لأن علمني شغله مهمة :
    غيرت فكري.. فتغير شكلي 😊

اترك رد

لن يتم نشر عنوان بريدك الإلكتروني.