هبوط السكر في الكيتو دايت

إذا كنت أعاني من هبوط السكر يصير أطبق الكيتو أو لا؟هذا السؤال انطرح عليا من بعض العضوات في الكروب وما جاوبت بالتعليق وفضّلت أن أكتب عن هذا الموضوع حتى الكل يستفيد من الجواب لأن إحتمال عندك أحد من أقاربك يعاني من هاي المشكلة ويريد يطبق الكيتو ،أو أحتمال إذا كنت أنت واحد من الأشخاص الي عنده هبوط مستمر في سكر الدم وتريد تعرف شنو الحل.الجواب :هبوط السكر سببه بالحقيقة هو إرتفاع سكر الدم وزيادة إفراز الأنسولين لذلك قد تسمع هذا الكلام لأول مرة أنه السبب الحقيقي لهبوط سكر الدم هو بالحقيقة إرتفاع إفراز الأنسولين لأن عمل الأنسولين هو تخفيض نسبة السكر بالدم. طيب قد واحد يسأل ويگول زين احنه ما رح نحتاج إلى السكر لغرض موازنة السكر بالدم؟ المشكلة هي أنه إذا تناولت أي سكر أو حلا حتى تصّعد سكر الدم رح يصعد معاه الأنسولين حتى يخفضه. حالة مقاومة الأنسولين والي نشوفها عند الاشخاص المصابين بالسكري طول الوقت سببها هو الزيادة المزمنة والدائمة للانسولين. وبحالة مقاومة الأنسولين فإن الجسم يصنع (سبعة أضعاف) الأنسولين عن الأشخاص السليمين. فالمشكلة مو أنه تاكل حلا لكن المشكلة هو أنه جسمك أساساً يفرز الأنسولين بأضعاف مضاعفة عن عن الشخص السليم ولمن يصّعد عندك الأنسولين رح يخفض سكر الدم وتحدث عدنه حالة هبوط السكر hypoglycemia. زين السؤال المهم هو أنه شلون نحافظ على مستويات طبيعية من الأنسولين بالجسم؟ وشلون نحيّد ونعدل حالة هبوط السكر؟ لازم نخلي كميات الكربوهيدرات السكر منخفضة بالطعام ولازم ما نتاول وجبات بشكل متكرر frequent meals ولازم نتاول المغنيسيوم والبوتاسيوم وفيتامين B1 لأن هاي العناصر رح تساعدك في دعم وتصحيح حالة (مقاومة الأنسولين). وإذا نرجع لكتب الطب رح نشوف أنه يوصون مريض السكري أن يحمل معاه قطعة حلوى بجيبه وأنه ماكو داعي من تقليل المأكول من السكر والكربوهيدرات ويگدر يبقى على نظام أكله (والي هو نفسه هذا نظام الأكل الغير صحي وصحيح الي سبّب له هاي المشكلة بالأساس وهي حالة مقاومة الأنسولين). طيب ما أنت إذا طبقت هاي النصائح والتوصيات فأنت رح ترفع من مستويات الأنسولين بجسمك وما رح تعالج المشكلة ابداً ورح تبقى تدور في حلقة مفرغة.ببساطة كل الي عليك أن تسويه هو تطبيقك لنظام كيتو صحي مع صيام متقطع وبشكل تدريجي وسلس ورح تبدي بثلاث وجبات بالبداية في اليوم وماكو اي سناك بيناتهم وبوجباتك ضيف البروتين والمغنيسيوم والبوتاسيوم وفيتامين B1 ، وبعد فترة تنتقل لنظام الوجبتين باليوم والهدف من ذلك هو حتى نحافظ على مستويات منخفضة من الأنسولين وبهذا الشي رح نعالج ونصحح حالة الخطأ وهي حالة مقاومة الأنسولين. شكراً

اترك رد

لن يتم نشر عنوان بريدك الإلكتروني.